رسالة من الحكومة لابنها المواطن
عزيزى المواطن بتاع النضال
يا راكب دماغك و غاوي الحلال
نصيحة يا صاحبي بلاش الخيال
و غمض عيونك و ربِّي العيال
بلاش المناكفة و لايم و عيش
هتتعب معانا و سهمك يطيش
نلفق لأهلك قضية حشيش
و تصبح حكاية و نكتة و مثال
تعالى و هاودنا و عدي الأمور
و عيش فى الطراوة و خش الطابور
لكن لو هتزعل و دمك يفور
هنشهد نهايتك فى بحر الرمال
***
هتصبح حرامي هتصبح أمير
هتصبح حرامي و ندل و أجير
و نقدر نلخبط فى أصلك كتيير
و جدك شحاتة هيصبح شحال
***
هنحلف بإن الحبايب شافوك
بتقبض يا خاين و تقتل أخوك
ساعتها مراتك هتلعن أبوك
و تلطم و تنعي أحط الرجال
***
مالكش أنت دعوة بكل اللي ضاع
و مين اللى شاري و مين اللي باع
و مين اللي كيل و مين اللي شال
***
فحب الحكومة و حب السلام
و علم ولادك يشدوا الحزام
علشان بكرة هياكلو حمام
و ينسوا الأسية و ينسوا الهزال
***
فلازم يا صاحبى تغمض عنيك
و طنش علينا نطنش عليك
و إياك تشاور.. نقطع أيديك
و تصبح مواطن ما يسواش ريال
***
عزيزى المواطن بتاع النضال
يا راكب دماغك و غاوي الحلال
نصيحة يا صاحبي بلاش الخيال
ليست هناك تعليقات:
إرسال تعليق